नुवाकोट ।
नुवाकोट जिल्ला, म्यागाङ गाउँपालिका–६ (साबिक सामरी गाउँ पञ्चायत–२) का बासु सापकोटा २०४६ साल फाल्गुन महिनादेखि बेपत्ता छन्। भारतीय सेनामा भर्ती हुन बुबा लेखनाथ सापकोटासँगै भारत गएका बासु त्यसयता परिवारको सम्पर्कमा छैनन्।

भर्ती प्रक्रियामा ढिलाइ भएपछि बासुलाई उनका बुबाले इलाहाबादमा भारतीय प्रहरीका एक उच्चपदस्थ व्यक्तिको घरमा घरेलु कामदारका रूपमा छोडेर नेपाल फर्किएका थिए। सुरुका केही महिना बासुले चिठीमार्फत परिवारसँग सम्पर्कमा रहे। तर, करिब एक वर्षपछि अचानक सम्पर्कविहीन भए। बासुका बुबाले इलाहाबाद पुगेर सोधपुछ गर्दा घरधनीले “तिम्रो छोरा झोला गुन्टा बोकेर घर जान्छु भनी निस्किएको हो” भन्ने जवाफ मात्र दिए। त्यसयता ३४ वर्ष बितिसक्दा पनि बासुको कुनै खबर छैन।

परिवारको अथक प्रयास र दाजुको भावुक अपिल

बासुको खोजीमा परिवारले सामाजिक सञ्जाललगायत विभिन्न माध्यमबाट प्रयास गरे पनि अहिलेसम्म कुनै जानकारी प्राप्त भएको छैन। बासुका दाजु केशब सापकोटा भक्कानिँदै भन्छन्, “भाइ, तिमीले लेखेका चिठी अझै सम्झन्छु, पढ्दा मेरो आँखाबाट आँशु रोकिँदैन। हिजो जस्तै लाग्छ ती दिनहरू। हाम्री आमाले तिमीलाई ११ वर्षसम्म पर्खेर, खोजेर बित्नुभयो। अहिले बुबाको अवस्था पनि अत्यन्त नाजुक छ। ८८ बर्ष  पुग्नुभयो।म पनी तिमिलाई खोज्दै १८ वर्षदेखि विदेशमै छु। तिमी जहाँ छौ, जुन अवस्थामा छौ, अप्ठ्यारो नमानी हामीलाई सम्पर्क गर। हाम्रो घरको ढोका तिम्रो लागि सधैं खुल्ला छ।”

बासु सापकोटाको खोजीमा सहयोगका लागि विनम्र अनुरोध

परिवारले बासु सापकोटाको पुरानो तस्बिर सार्वजनिक गर्दै उहाँलाई चिन्ने वा देखेका जो–कसैलाई जानकारी दिन हार्दिक अनुरोध गरेको छ।
सम्पर्क नम्बरहरू:
* ९८४१७४८१९५ (केशब सापकोटा)
* ९८४००६६१६२

विनम्र अनुरोध:

यदि तपाईंले फोटोमा देखिएका बासु सापकोटालाई कतै देख्नुभएको छ, चिन्नुभएको छ वा कुनै पनि जानकारी छ भने कृपया माथि उल्लेखित नम्बर सम्पर्क गरी जानकारी दिन र यो सूचना सकेसम्म धेरै व्यक्तिमा पुगोस् भन्ने उद्देश्यले कृपया शेयर गरी खोजी कार्यमा सहयोग गरिदिन अनुरोध छ ।