जुबेल, साउदी अरब —
साउदीको जुबेल क्षेत्रमा ‘इभेन्ट म्यानेजमेन्ट ग्रुप (EMG)’ ले आगामी मे ६ मा हुने भनिएको चर्चित राष्ट्रिय कलाकारको सांस्कृतिक कार्यक्रममा आफ्नो कुनै संलग्नता नरहेको स्पष्ट पारेको छ।

EMG ले हालै एक विज्ञप्ति जारी गर्दै आफ्नो उद्देश्य, कार्ययोजना र भावी गतिविधिबारे जानकारी दिएको छ। विज्ञप्तिमा समूहले कुनै पनि व्यक्तिगत लाभ, संघ, संगठन वा राजनीतिक उद्देश्य नभई केवल नेपाली समुदायको एकता, सस्कृति र पहिचानको प्रवर्द्धनका लागि काम गर्ने बताएको छ।

विज्ञप्तिमा उल्लेख भएअनुसार, विगत केही वर्षदेखि जुबेलमा नेपाली समुदायले विभिन्न कार्यक्रमहरू सञ्चालन गर्दै आएको र ती प्रयासलाई अझ व्यवस्थित, समुन्नत र समावेशी ढंगले अगाडि बढाउने हेतुले EMG गठन गरिएको हो।

समूहको मुल नारा “हामी नेपाली, हाम्रो एक, हाम्रो उद्देश्य – एकता र सम्मान” रहेको छ। समूहले सांगीतिक कार्यक्रम, सांस्कृतिक साँझ, रक्तदान, सम्मान कार्यक्रम, सामाजिक सेवा लगायतका गतिविधिहरू आगामी दिनमा सञ्चालन गर्ने जानकारी दिएको छ।

साथै, कुनै पनि सांस्कृतिक वा मनोरञ्जनात्मक कार्यक्रम गर्दा पारदर्शिता, सहभागिता र सहकार्यलाई पहिलो प्राथमिकतामा राखिने समूहले जनाएको छ।

विज्ञप्तिमा भनिएको छ, “जुबेल क्षेत्रमै पहिलो पटक नेपाली कलाकारलाई सम्मान गर्ने, नेपाली सस्कृति, भाषा र पहिचानलाई पूर्ण रूपमा अँगाल्ने हाम्रो कार्यक्रमको मुख्य विशेषता हो।”

EMG ले जुबेल क्षेत्रका सम्पूर्ण नेपाली समुदायसँग सुझाव, सल्लाह र सहभागिताका लागि आग्रह गर्दै आगामी दिनमा एकता, सहकार्य र पारस्परिक सम्मानका साथ अघि बढ्ने प्रतिबद्धता जनाएको छ।