सुनवल , युबराज पुन– किर्तिपुर बौद्ध बिहार तथा गुम्बा समितिको आयोजनामा २६४९औं बुद्ध जयन्ती तथा त्रीयोग दिवस भव्य रूपमा सम्पन्न गरिएको छ। कार्यक्रम किर्तिपुर बौद्ध बिहारको सभाहलमा सम्पन्न भएको हो, जसको अध्यक्षता बौद्ध बिहारका अध्यक्ष डिग बहादुर सारु मगरले गर्नुभयो।

कार्यक्रममा सुनवल नगरपालिकाका नगरप्रमुख विमला अर्याल प्रमुख अतिथि रहनुभयो भने वडा नम्बर ३ का अध्यक्ष पविन गुरुङ विशेष अतिथि तथा नगर कार्यपालिका सदस्य श्याम गुरुङ विशिष्ट अतिथिका रूपमा उपस्थित हुनुहुन्थ्यो। साथै, विभिन्न संघ-संस्था, राजनीतिक दलका प्रतिनिधिहरू र जेनिथ युवा क्लबका अध्यक्ष दीपक श्रेष्ठको पनि सक्रिय सहभागिता रहेको थियो। 

कार्यक्रममा धर्मगुरु तथा नेपाल मगर संघ नगर समितिका अध्यक्ष मन बहादुर थापाले गौतम बुद्धको जन्म, बौद्ध ज्ञान प्राप्ति र धर्मका विषयमा प्रेरणादायी प्रवचन दिनुभयो। साथै, निवर्तमान वडा अध्यक्ष कर्ण बहादुर सेन, पविन गुरुङलगायत विभिन्न संघ-संस्थाका प्रतिनिधिहरूले शुभकामना मन्तव्य व्यक्त गर्नुभयो।

नगर प्रमुख विमला अर्यालले आफ्नो मन्तव्यमा किर्तिपुर बौद्ध बिहारको भौतिक संरचना अझ व्यवस्थित बनाउनका लागि नगरपालिका स्तरबाट आवश्यक सहयोग गर्ने प्रतिबद्धता जनाउनुभयो। उहाँले गर्मी मौसममा गुम्बामा समस्या हुने भएकाले फलसिलिङ राख्ने, रेलिङ निर्माण गर्ने तथा नवगठित नौमती बाजा समूहका लागि पोशाकको व्यवस्था गर्ने कुरामा विशेष प्राथमिकता दिने बताउनुभयो। साथै, हालै विवादित दमकल सम्बन्धी विषयमा भारतको कलकत्ताको बन्दरगाहमा दमकल आइपुगेको भए पनि नेपाल सरकारको कागजी प्रक्रिया ढिलो भएकाले सो प्रक्रिया पूरा भएलगत्तै दमकल आइपुग्ने जानकारी दिनुभयो।

कार्यक्रमको स्वागत मन्तव्य मन बहादुर थापाले राख्नुभयो भने संचालन गुम्बा समितिका सचिव टेक बहादुर चितौरे मगरले गर्नुभयो।

उक्त कार्यक्रमले बुद्धको शिक्षा, शान्ति र करुणाको सन्देश फैलाउँदै स्थानीय बौद्ध समुदाय र नगरवासीहरूलाई एकत्रित गरेको महत्वपूर्ण अवसरको रूपमा स्मरणीय बन्यो।