नुवाकोट,  – तामाङ समुदायको सांस्कृतिक पर्व सोनाम ल्होछार यस वर्ष तारकेश्वर गाउँपालिका–१ दाङसिङमा भव्यताका साथ मनाइने भएको छ। सिर्जनशिल समाज सुधार युवा क्लबको आयोजनामा मञ्जुश्री संवत् २८६१ औं सोनाम ल्होछार तथा सांस्कृतिक कार्यक्रम “डुल ल्हो” (सर्प वर्ग) लाई स्वागत गर्दै मनाउने तयारी गरिएको छ।

“शास्त्र हराए संस्कार हराउँछ, संस्कार हराए संस्कृति हराउँछ, संस्कृति हराए मानव अस्तित्व नै हराउँछ” भन्ने मूल नाराका साथ आयोजना गरिने यस कार्यक्रमले तामाङ समुदायका परम्परा, संस्कार, र संस्कृति संरक्षणमा जोड दिने लक्ष्य लिएको छ।

सोनाम ल्होछारको महत्त्व

सोनाम ल्होछार तामाङ समुदायको नयाँ वर्ष हो, जुन प्रत्येक वर्ष मञ्जुश्री संवतअनुसार मनाइन्छ। यो पर्वले घरआँगन सफा गर्ने, विशेष परिकार पकाउने, तथा शुभकामना साटासाट गर्ने परम्परा झल्काउँछ। यस पर्वले नयाँ सुरुवात र सकारात्मक ऊर्जा ल्याउने मान्यता रहेको छ।

कार्यक्रमका विशेषता

कार्यक्रममा तामाङ संस्कृति झल्काउने भेषभूषा, परम्परागत तामाङ सेलो, म्हेन्दो माया, लामा नृत्य तथा सांस्कृतिक झाँकीहरू प्रस्तुत गरिनेछ। विशेष आकर्षणका रूपमा म्हेन्दो माया गायक सागर एस. वाइबासहित स्थानीय कलाकारहरूको प्रस्तुति हुने जनाइएको छ।

तामाङ समुदायका अग्रजहरूले युवापुस्तालाई इतिहास, परम्परा, र संस्कृतिबारे सचेत गराउन आफ्ना अनुभवहरू साझा गर्नेछन्।

विशेष अतिथिहरूको उपस्थिति

कार्यक्रममा बागमती प्रदेशका मुख्यमन्त्री बहादुर सिंह लामा प्रमुख अतिथि र तारकेश्वर गाउँपालिकाका प्रमुख शिव अधिकारी (अविरल) विशेष अतिथि रहनुहुनेछ। साथै, स्थानीय संघसंस्था, बुद्धिजीवी, शिक्षाविद्, र समुदायका अगुवाहरूको पनि उल्लेख्य सहभागिता रहनेछ।

सिर्जनशिल समाज सुधार युवा क्लबका अध्यक्षले यस कार्यक्रमले तामाङ समुदायको सांस्कृतिक पहिचानलाई सुदृढ बनाउन र समाजमा सामाजिक एकता र सद्भाव बढाउन मद्दत गर्ने विश्वास व्यक्त गर्नुभएको छ। कार्यक्रममा सबै तामाङ र गैर-तामाङ समुदायलाई सहभागी भई यसलाई सफल बनाउन अनुरोध गरिएको छ।

कार्यक्रम विवरण

मिति: २०८१ माघ २६ गते, शनिबार

स्थान: दाङसिङ गोर्खापङ (जब्बरे चौर), तारकेश्वर–०१, नुवाकोट

समय: बिहान १०:०० बजे

सोनाम ल्होछार विशेष कार्यक्रमले तामाङ समुदायको मौलिकता जोगाउन र भावी पुस्तामा सांस्कृतिक गर्वको भावना जागृत गराउन महत्वपूर्ण योगदान पुर्‍याउने समाजले दाबी गरेका छन्।