नुवाकोट – श्री अञ्जिरे माध्यमिक विद्यालय, विदुर–१३, नुवाकोटले आफ्नो ४२ औं वार्षिकोत्सव तथा अभिभावक दिवसको अवसरमा नगर प्रहरी कार्यालय कोलनीका इन्चार्ज प्रहरी नायब निरीक्षक (सहि) श्री कृष्णराम गौतमलाई सम्मानसहित कदरपत्र प्रदान गरेको छ।

उहाँलाई कार्यक्रममा प्रमुख अतिथि बागमती प्रदेशका मुख्यमन्त्री माननीय बहादुर सिंह लामाद्वारा कदरपत्र प्रदान गर्दै सम्मान गरिएको थियो। विद्यालयले बाल विवाह, बाल हिंसा, लागू पदार्थ दुर्व्यसन, महिला घरेलु हिंसा, साइबर अपराध, र सडक सुरक्षाजस्ता सामाजिक मुद्दामा जनचेतनामूलक कार्यक्रम सञ्चालन गरी विद्यालयलाई सहयोग पुर्‍याएको योगदानका लागि गौतमको उच्च मूल्यांकन गर्दै यो सम्मान प्रदान गरेको हो।

गौतमले शिक्षण र सामाजिक अभियानहरूमा विशेष सक्रियता देखाउँदै समाजमा सकारात्मक प्रभाव पुर्‍याउन महत्त्वपूर्ण भूमिका खेलेको भन्दै विद्यालयले धन्यवाद ज्ञापन गरेको छ। कार्यक्रममा नगर प्रमुख राजेश श्रेष्ठ, विद्यालय व्यवस्थापन समिति अध्यक्ष रामप्रसाद अधिकारी, र प्रधानाध्यापक रामचन्द्र मण्डलरीले गौतमको योगदानको खुलेर प्रशंसा गरे।

उक्त अवसरमा विद्यालयले अन्य विविध सामाजिक र शैक्षिक कार्यक्रमहरू पनि सञ्चालन गरेको थियो, जसले स्थानीय स्तरमा शिक्षा र समाज सेवाका क्षेत्रमा उल्लेखनीय योगदान पुर्‍याएको छ।