दमाम, साउदी अरेबिया: साउदी अरेबियामा बसोबास गर्ने नेपाली समुदायका लागि दोस्रो दमाम भेट्रान गोल्डकप २०२५ को आयोजना हुने भएको छ।

नेपाली समुदायबीच लोकप्रिय दम्माम भेट्रान फुटबल क्लबले यो प्रतियोगिता मुस्लिम धर्मावलम्बीहरूको पवित्र पर्व ईद अल फितरको उपलक्ष्यमा आगामी मार्च ३० तारिख आयोजना गर्ने भएको हो।

“स्वास्थ्य र अनुशासनका लागि खेल” भन्ने भावना सहित आयोजित यस प्रतियोगिताले खेलकुदको महत्वलाई उजागर गर्दै स्वास्थ्य र अनुशासनको प्रवर्द्धन गर्ने लक्ष्य राखेको छ। साथै, यसले नेपाली समुदायमा सामाजिक एकता बलियो बनाउन र नेपाली संस्कृतिलाई जीवन्त राख्न महत्त्वपूर्ण भूमिका खेल्ने अपेक्षा गरिएको छ।

प्रतियोगितामा साउदी अरेबियाका विभिन्न क्षेत्रबाट नेपाली फुटबल क्लबहरूको सहभागिता रहनेछ। दमाम भेट्रान फुटबल क्लबका प्रथम उपाध्यक्ष अनमोल ठकुरीका अनुसार, प्रतियोगिताको तयारी शुरु भैसको छ।यस वर्षको प्रतियोगितालाई अझ भव्य र सफल बनाउने प्रतिबद्धता उनले व्यक्त गरेका छन्।  

प्रतियोगिता आगामी मार्च ३० तारिख, ईद अल फितरको पहिलो दिन, थुग्बा फुटबल क्लबको मैदान, अजिजिया खसी बजारमा आयोजना हुनेछ। यो स्थान यातायातको सहज पहुँच र पर्याप्त दर्शक क्षमता भएकोले खेलाडी र दर्शकका लागि अनुकूल मानिएको छ।

प्रतियोगितामा विजेताले नेरु दुईलाख ५२ हजार (७ हजार रियाल) नगद पुरस्कार, ट्रफी, र मेडल प्राप्त गर्नेछ। उपविजेताले नेरु एकलाख ४४ हजार (४ हजार रियाल) नगद पुरस्कार, ट्रफी, र मेडल पाउनेछ। त्यस्तै, उत्कृष्ट खेलाडी, उत्कृष्ट गोलकिपर, सर्वाधिक गोलकर्ता लगायत विभिन्न विधामा उत्कृष्ट प्रदर्शन गर्ने खेलाडीहरूलाई पनि विशेष पुरस्कार प्रदान गरिने छ।

गत वर्ष आयोजित पहिलो संस्करणको दमाम भेट्रान गोल्डकपले ठूलो सफलता हासिल गरेको थियो। उक्त प्रतियोगितामा समरानी स्टारले उपाधि जित्दा युनाइटेड फुटबल क्लब उपविजेता बनेको थियो।

यस वर्षको प्रतियोगितालाई अझ भव्य र प्रभावकारी बनाउन आयोजकले व्यापक तयारी गरिरहेको छ। नेपाली खेलकुदप्रेमीहरूको उत्साहजनक सहभागिताले यो प्रतियोगिता नेपाली समुदायबीच खेलकुद र मित्रतालाई अझ मजबुत बनाउने विश्वास गरिएको छ।