युबराज पुन, नवलपरासी ।

सुनवल सामुदायिक सिकाइ केन्द्रले आर्थिक वर्ष २०८१/८२ को बजेटबाट चार समूहका ५० महिलाहरूलाई लक्षित गरी फोहोरमैला व्यवस्थापन र करेसाबारी सम्बन्धी तीनदिने तालिम सम्पन्न गरेको छ। तालिममा फोहोरमैलाबाट जैविक मल उत्पादन, करेसाबारी तयारी, नर्सरी निर्माण, र विषादीरहित तरकारी उत्पादन गर्ने विषयमा प्रशिक्षण दिइएको थियो।

लुम्बिनी प्रदेश सीटीईभीटी प्रशिक्षक बिमल ढकालले प्रशिक्षण प्रदान गर्नुभएको तालिममा महिलाहरूलाई व्यावसायिक रूपमा आत्मनिर्भर बनाउन आवश्यक ज्ञान र सीप हस्तान्तरण गरिएको हो।

कार्यक्रम सुनवल सामुदायिक सिकाइ केन्द्रका अध्यक्ष सञ्जय श्रेष्ठको अध्यक्षतामा सम्पन्न भएको थियो। वडा नं. १ का अध्यक्ष मनबहादुर थापाले प्रमुख अतिथिको रूपमा उपस्थित रहँदै महिलाहरूको उत्पादनलाई प्रोत्साहन गर्न यस्ता तालिमले महत्त्वपूर्ण भूमिका रहको बताउनु भयो।

तालिममा लोटस महिला समूह, मिलिजुली महिला समूह, कँवर महिला समूह, र नमूना कृषि समूहका महिलाहरूले सहभागिता रहेको छ ।

नमूना कृषि समूहकी अध्यक्ष दुर्गा पाण्डेले तालिम मात्रै पर्याप्त नभएको बताउँदै पालिकाले समूहहरूलाई जीविकोपार्जनका लागि कृषिजन्य उत्पादनमा आवश्यक जग्गा र बजार व्यवस्थापनको समेत प्रबन्ध गर्नुपर्ने माग राख्नुभयो।

वडा अध्यक्ष मनबहादुर थापाले महिलाहरूलाई आत्मनिर्भर बनाउन तालिम नियमित रूपमा सञ्चालन गरिने बताउनुभयो। साथै, महिलाहरूले उत्पादन गर्ने कृषिजन्य वस्तुहरूको संरक्षणका लागि शीतभण्डार निर्माण भइरहेको र बजार व्यवस्थापनका लागि हाटबजारमा सटरकोठा तयार हुँदै गरेको जानकारी दिनुभयो।

यस तालिमले महिलाहरूलाई फोहोरमैला व्यवस्थापन र करेसाबारीको प्रभावकारी प्रयोगमार्फत आत्मनिर्भर बन्ने अवसर प्रदान गर्ने अपेक्षा गरिएको छ।