अन्तिम जितअघि मलाई हारमाला सुहाउँछ
छाती छेडी मुटु चुम्ने तिखा भाला सुहाउँछ
तिमी बस मेरै खुनले सजिएको महलभित्र
ढोकाबाहिर मेरा हातमा चाबीताला सुहाउँछ !

~~~
मुटुको भक्कानो टिपेर राख्ने गह बनाउँछु !
पीडाको परेली धोएर हाँस्ने दह बनाउँछु !!
राजनीतिक मोलतोलको बजारमा खोजी गर्दै नगर,
साहित्य वाटिका चुमेर मिठो मह बनाउँछु !!

~~~~~~
धुरीमाथि मान्द्रोभरि बिस्कुन तारा जूनका देख्छु
घरको बुइगल अटालीमा रजाइँ मुसा घुनका देख्छु
मुक्ति मिल्छ ऐँठनबाट घण्टी बज्दा ट्यार्र ट्यार्र
म्यासेन्जरमा आफ्नै ज्यानको मुटु ठुन्का ठुन्का देख्छु!

भरत सिग्देल
नुवाकोट