काठमाडौं ।
माथिल्लो तामाकोसी जलविद्युत आयोजनाको दैनिक आम्दानी औसत ४ करोड रुपैयाँ रहेको छ । आयोजनाले मासिक १ अर्ब २० करोड रुपैयाँ आम्दानी गर्छ । गएको जेठ १९ गतेदेखि आयोजनाले पूर्ण क्षमतामा ४५६ मेगावाट बिजुली उत्पादन गरिरहेको छ ।

२०७८ भदौ ४ गतेदेखि ४ वटा युनिटहरू र सोही महिनाको २५ गतेदेखि बाँकी २ वटासमेत ६ वटै युनिटहरूबाट व्यावसायिक रुपमा बिजुली थालेको हो ।

वर्षा प्रारम्भ भएपछि तामाकोसी नदीको बहाव डिजाइन डिस्चार्जभन्दा बढी आएसँगै गत २०७९ जेठ १९ गतेदेखि कुनै कुनै दिन प्राविधिक कारणले केही घण्टा विद्युत उत्पादन कम भए पनि २४ सै घण्टा पूर्ण क्षमतामा विद्युत उत्पादन भइरहेको आयोजनाले जनाएको छ ।

अपर तामाकोसी हाइड्रोपावर लिमिटेडले बिजुली बेचेर वार्षिक ९ अर्ब रुपैयाँ बढी आम्दानी गर्ने छ । कम्पनीले आयोजना बनाउन लिएको ऋण तिर्न थालिसकेको छ ।

कम्पनीले बिजुली बेचेर गत वर्ष ७ अर्ब १७ करोड ३५ लाख रुपैयाँ आम्दानी गरेको छ । तर सेयरधनीहरूले प्रस्तावित रोल्वालिङ खोला डाइभर्सन परियोजना सञ्चालनमा आएपछि मात्र लाभांश पाउने भएका छन् । कम्पनीले ८ अर्ब रुपैयाँ थप लगानी गरेर रोल्वालिङ डाइभर्सन बनाउँदै छ ।

यो आयोजना सम्पन्न भएपछि तामाकोसीको प्रणालीमा ३१ करोड रुपैयाँ बिजुली थप हुने छ । माथिल्लो तामाकोसीको उत्पादन २ अर्ब २८ करोड १० लाख युनिटबाट बढेर २ अर्ब ५९ करोड युनिट पुग्ने छ । यसबाट आम्दानी बढ्ने छ । रोल्वालिङ नमिसिएसम्म लाभांश लिन अझै ४ ५ वर्ष कुर्नुपर्ने भएको छ ।