गैर कानुनी रुपमा भाग्न उक्साउने ठगहरुबाट सचेत रहन साउदी राजदूतावासको आग्रह
- २९ पुष, २०७८ २०:५४
- 905 Views
रियाद ,साउदी अरब ।
राम्रो रोजगारी दिलाई दिने नाममा ठगहरुको प्रलोभनमा नपर्न नेपाली राजदूतावास रियाद एक विज्ञप्ति जारी साउदीमा कार्यरत नेपाली श्रमिकहरु लाई सचेत गराएको छ।
दूतावासले साउदी अरबमा लामो समयदेखि बस्दै आएका केही नेपालीहरुले छद्म नाम / परिचयबाट र फेरिरहने टेलिफोनबाट सिधासादा नेपाली कामदारलाई सम्पर्क गरी ठग्ने गरेका गुनासाहरु प्राप्त भएका बताउदै भखरै ईकामा बनाएका श्रमिकहरुलाई उनीहरुले खाइपाइ आएको तलव भत्ताभन्दा बढी दिने बहानामा भइरहेको रोजगारी छाड्न प्रेरित गर्ने र गैर कानूनी हिसाबले काममा लगाउने गरेको पाएको विज्ञप्तिमा उल्लेख गरिएको छ ।
कम्पनी छोडेर भाग्नु गैरकानूनी र अनैतिक हो भने त्यस्ता कामदार भगाउनु अपराध हो । पछिल्लो समयमा यस प्रकार ईकामा भएका कामदारलाई भगाउने र कामदार भाग्ने क्रम बढेकोले यस प्रकारको निन्दनीय काम नगर्न / नगराउन हुन सम्बन्धित सबैमा अनुरोध गरिन्छ । यसबाट साउद अरबमा रहेका रोजगारदाताले नेपालीहरुलाई हेर्ने दृष्टिकोणमा शंका र अविश्वासहरु बढ्दै गएको पाइएको बताउदै एउटा कम्पनीको ईकामा लिएर भाग्ने प्रवृत्तिलाई निरुत्साहित गर्न कामदारलाई सचेत गराइदिन साउदी अधिकारीहरुले पनि राजदूतावासलाई अनुरोध गरेका दूतावासले जनाएको छ।
मानव तस्करीकारूपमा रहेको कामदार भगाउने अपराधमा संलग्नहरुको अधिकारीहरुले सूक्ष्म हिसाबले खोजी गरिरहेको हुँदा यस प्रकारका आपराधिक क्रियाकलापमा संलग्न नहुन सम्बन्धित सबैलाई सचेत गराउदै यसप्रकारको अपराध गर्ने जो कोहीको भरपर्दो सूचना आफू नजिकैको प्रहरी कार्यालय वा नेपाली राजदूतावासमा उपलब्ध गराइ सहयोग गरिदिनु हुन दूतावासले अनुरोध गरेको छ।
साउदी अरबमा गैर – कानूनी हैसियतमा रहेको व्यक्ति बिरामी भएर उपचार गर्नुपर्दा अस्पतालमा छिर्न नपाइने , दुर्घटना भएर घाइते वा अंगभंग वा अपांग भयो भनेओ त्यसको उपचार र क्षतिपूर्ति नपाइने एवम् त्यस्तो व्यक्तिको कथम् कदाचित कुनै कारणबाट मृत्यु हुन गएमा मृतकको शव नेपाल पठाउने जिम्मा समेत कसैले नलिने हुंदा कसैको प्रलोभनमा परी वा क्षणिक लाभ हेरेर आफ्नो कम्पनीबाट भाग्ने र गैर कानूनी हैसियतमा बस्ने काम कदापि नगर्न / नगराउनु हुन सम्बन्धित सबैमा दूतावासले अनुरोध गरेको छ।
पछिल्लो समय साउदीमा विभिन्न सामाजिक ,राजनीति,जातीय क्षेत्रीय संस्थामा आबद्ध रहेर
आफुलाई सामाजिक अभियन्ता बताउनेहरु नै यस्तो ठगीमा सङ्लग्न रहेको पाएको श्रमिक स्रोतले बताएको छ।