“गरे के हुँदैन र यहाँ”
- २८ पुष, २०७७ १५:१८
- 399 Views
“गरे के हुँदैन र यहाँ”
मैले देखेको छु
अरबका खाडिहरुमा साग फुलेका
हिमालका सिरेटोहरुमा पनि धान झुलेका
ताता बगरहरुमा लौका
तराईका फाँटमा स्याउ
पहाडका काँखमा च्याउ प्रसस्तै उम्रीएका
सुख्खा राता डाँडा पाखो भरी सुन्तला र जुनार लटरम्म झुण्डिएका।
अब बोलेर मात्रै होईन
हेरेर मात्रै होईन
सुनेर मात्रै पनि होईन
गरेर केहि देखाउनु छ यहाँ ।
पन्छाउनु छ झाडी, बनमासा र बन्सो
कोतर्नु छ भित्तो, पाखा र पखेरो
जोत्नु छ बन्जड जमिनहरु
मिल्नु छ दाजुभाई र साथिसंगिहरु
बगाउनु छ पसिना यहीँ
अनि फलाउनु छ अलिकति बिकासका मोतिहरु।
रोपेर घामको ज्योति
छरेर हावाको बीउ
सिंचेर नदिको पानी
उमार्नु छ समृद्धिका बेर्नाहरु।
जगाउनु छ रोजगारका दियोहरु।
अनि रोक्नु छ बिदेशिने पाईलाहरु।
कृषिमा क्रान्ति गर्नाले
इज्राएल ,पोल्यान्ड र न्युजिल्यान्ड यहीँ हुनेछ।
उद्योगिकरण गर्नाले
अमेरिका, बेलायत र सिंगापुर यहि बन्नेछ।
आउनुस
अलिकति ईमानदार बनौं
अलिकति मिहिनेत गरौं
अलिकति समाजसेवामा हात बढाऔं
अलिकती पसिना यहीँ माटोमा खन्याऔं
अनि बन्ने छ देश
बन्ने छौं हामी नेपाली।
जय देश ।।
रामचन्द्र तिम्सिना
(आवाज)